Қостанай облысында "Қостанай - Рудный - Денисовка - Комсомольское - Қарабұтак" автожолының 234-254 шақырым аралығындағы учаскесінде орташа жөндеу жұмыстары аяқталды

"ҚазАвтоЖол" ұлттық компаниясы республикалық маңызы бар KAZ-19 "Қостанай - Рудный - Денисовка - Комсомольское - Қарабұтак" автомобиль жолының 234-254 шақырым аралығындағы Жайылма ауылынан Ақтөбе облысының шекарасына дейінгі учаскесінде орташа жөндеу жұмыстарының аяқталғаны туралы хабарлайды. Жөндеуден өткен жол учаскесінің жалпы ұзындығы 20 шақырымды құрады.

Аталған жол учаскесі Қамысты ауданының аумағынан өтеді және өңірдің әкімшілік орталығы - Қостанай қаласына кіреберістердің бірі болып саналады. Сондай-ақ, бұл жол Ақтөбе облысымен көлік қатынасын қамтамасыз етіп, Ресей Федерациясымен мемлекеттік шекараға шығуға мүмкіндік береді.

KAZ-19 автомобиль жолының стратегиялық маңызы бар, ол жүк пен жолаушылар тасымалының, соның ішінде халықаралық бағыттардың қозғалысын қамтамасыз етуде маңызды рөл атқарады.

Аталған учаскеде соңғы күрделі жөндеу жұмыстары 2017 жылы жүргізілген. Бұл жол алғаш рет 1941 жылы салынған және содан бері шұңқырларды жөндеу жұмыстарын қоспағанда, жол жабыны айтарлықтай тозған.

Орташа жөндеу аясында келесі жұмыстар атқарылды:

- ескі асфальтбетон жабыны жонылды (қалыңдығы 5 см);

- асфальтбетонның төменгі (6 см) және жоғарғы (5 см) қабаттары төселді;

- жол жиектері бекітілді;

- учаскенің бүкіл ұзындығы бойынша (20 шақырым) жол таңбалары сызылды.

Жобаны жүзеге асыруға 32 бірлік жол-құрылыс техникасы және 37 маман жұмылдырылды.

Атқарылған жұмыстар автомобиль жолының техникалық жағдайын қалпына келтіруге, жол қозғалысы қауіпсіздігін едәуір арттыруға және өңірлер арасындағы тұрақты көлік байланысын қамтамасыз етуге мүмкіндік берді.